Онлайн
Էջմիածնի քաղաքապետ Դիանա Գասպարյանը Ծաղկաձորի «Գոլդեն Փելես» հյուրանոցում մեկուսացված քաղաքացիների խնդրանքով ֆեյսբուքյան իր էջում հրապարակել է նրանց նամակը:
Նամակում, մասնավորապես, ասված է.
«Հարգելի՛ հայրենակիցներ...
Մինչև վերջերս մենք ապրում էինք բնականոն առօրյայով, մեր ամենօրյա հոգսերով ու աշխատանքով, հաճախում կրթական հաստատություններ, զվարճանում ու հանկարծ...մեկ վայրկյանում ամեն ինչ խառնվում է իրար...Ստիպված ես լինում կայծակնային որոշում ընդունել, մեկ վայրկյանում թողնել ամեն ինչ և մեկուսանալ...Եվ սկսվում է բոլորովին նոր պատմություն ու էջ քո կյանքում...
Արդեն մի քանի օր է մեկուսացած ենք «ԳՈԼԴԵՆ ՓԵԼԵՍ»-ում...
Ինչքան էլ փորձենք, չենք կարողանալու ճիշտ և համապատասխան խոսքեր գտնել, որոնք արժանվույնս կարտահայտեն այն, ինչ զգում ենք մենք այստեղ։
Մեր ապրած տարիների ընթացքում առաջին անգամ զգում ենք, թե ինչ է նշանակում ՊԵՏՈՒԹՅԱՆ հովանավորություն, հոգատարություն, աջակցություն....
Կենցաղային կարիքներից մինչև սնունդը կազմակերպված է ամենաբարձր մակարդակով, ցանկացած խնդիր ծագելուն պես անմիջապես գտնվում են դրա լուծումները...
Տեսնելով այս ամենը՝ մեզ մնում է միայն ասել
ՇՆՈՐՀԱԿԱԼՈՒԹՅՈՒՆ բուժանձնակազմին...
ՇՆՈՐՀԱԿԱԼՈՒԹՅՈՒՆ սպասարկող անձնակազմին...
ՇՆՈՐՀԱԿԱԼՈՒԹՅՈՒՆ ոստիկաններին....
ՇՆՈՐՀԱԿԱԼՈՒԹՅՈՒՆ Կառավարությանը՝ ՎԱՐՉԱՊԵՏ Նիկոլ Փաշինյանի գլխավորությամբ...
ՇՆՈՐՀԱԿԱԼՈՒԹՅՈՒՆ մեր ՊԵՏՈՒԹՅԱՆԸ՝ մեզ սատարելու, մտահոգվելու ու ապավինելու համար...
Վստահ ենք, այս ճգնաժամը ոչ միայն հաղթահարելու ենք, այլև դուրս ենք գալու պատվով ու հաղթանակած...»:
Հիշեցնենք՝ շուրջ 3 տասնյակ քաղաքացիներ մեկուսացվեցին Ծաղկաձորի վերոնշյալ հյուրանոցում՝ Հայաստանում նոր տիպի կորոնավիրուսով վարակվածության առաջին դեպքի ախտորոշումից հետո. նրանք ռիսկային շփում էին ունեցել Իրանից Հայաստան ժամանած ՀՀ 29 տարեկան երիտասարդի հետ, որը կամովին ներկայացել էր բուժկենտրոն:
Տղամարդը, որի մոտ կորոնավիրուսի վարակը ախտորոշվել էր մարտի 1-ին, առողջացմամբ դուրս է գրվել հիվանդանոցից: Նա, ըստ էության, ՀՀ-ում առաջին բուժված հիվանդն է:
Քաղաքացիական բարձր գիտակցության դրսևորման համար կառավարությունը կխրախուսի նրան:
