«Ինքս ինձ պես». Հարութ Փամբուկչյանը ներկայացրել է Համո Սահյանի ստեղծագործության հիման վրա գրված երգի տեսահոլովակը

Հարութ Փամբուկչյանը երաժշտասերների դատին է հանձնել Համո Սահյանի «Ինքս ինձ պես» ստեղծագործության հիման վրա գրված երգի տեսահոլովակը:

Հոլովակի ռեժիսորը Խաչիկ Եղոյանն է, օպերատորը` Սուրեն Թադևոսյանը, մոնտաժն իրականացրել է Սուրեն Սարգսյանը:

Երգի երաժշտության հեղինակն Ավո Հարությունյանն է:

Հարութ Փամբուկչյանը, որին հանրության լայն շրջանակը ճանաչում է Ձախ Հարութ անունով, ծնվել է 1950 թվականին Երևանում։ Հայրը` Եսայի Փամբուկչյանը, ծնվել է 1901 թվականին Զեյթունում, մայրը՝ 1907-ին Տիգրանակերտում։ Եղեռնից հետո նրանք ապրել են Բեյրութում, իսկ այնտեղից 1946 թվականին եկել հայրենիք։

Փամբուկչյանը հաճախել է Երևանի թիվ 43 դպրոցը և ընդունվել Փ. Թերլեմեզյանի անվան գեղարվեստի ուսումնարանը, որն ավարտել է 1968 թվականին։

Նա վաղ պատանեկությունից հետաքրքրվել է երաժշտական գործիքներով ու սովորել նվագել կիթառ, սազ, բուզուկի, դհոլ ու դաշնամուր։ Իր ստեղծած «Էրեբունի» խմբով ելույթներ է ունեցել ամենատարբեր առիթներով ու կատարել ամենատարբեր տեսակի երաժշտություն, ներառյալ՝ ռոք, ռաբիզ ու շանսոն։