Ամուլսարի դիրքերը չեն բացվելու, հակառակը՝ ավելի ամրանալու են․Ամուլսարի պաշտպանական խումբը պատասխանում է Փաշինյանին - RadioVan.fm

Онлайн

Ամուլսարի դիրքերը չեն բացվելու, հակառակը՝ ավելի ամրանալու են․Ամուլսարի պաշտպանական խումբը պատասխանում է Փաշինյանին

2019-09-10 13:59 , Общество, 1386

Ամուլսարի դիրքերը չեն բացվելու, հակառակը՝ ավելի ամրանալու են․Ամուլսարի պաշտպանական խումբը պատասխանում է Փաշինյանին

Ամուլսարի պաշտպանական խումբը, անդրադառնալով վարչապետ Նիկոլ Փաշինյանի՝ Ամուլսարի հանքավայր տանող ճանապարհները ապաշրջափակելու վերաբերյալ խնդրանքին, հայտարարություն է տարածել, որում նշված է, որ թույլ չեն տալու հանքի շահագործումը։

Հայտարարությունում, մասնավորապես, ասված է․

«Տեղի ունեցավ անսպասելի հայտարարություն վարչապետ Նիկոլ Փաշինյանի կողմից, որում հիմնական կոչը հետևյալն էր՝ բացել Ամուլսարի պոստերը, բացել ճանապարհները Լիդիանի առաջ։ Բացել այն պարագայում, երբ մեր պետության կողմից վստահված միջազգային հետազոտող կազմակերպությունը բաց հայտարարեց բոլորի առաջ, որ Լիդիանի փաստաթղթերը թերի են և ոչ պրոֆեսիոնալ։ Բացել այն պարագայում, երբ մի ողջ առողջարանային քաղաք դեմ է իր հարևանությամբ ունենալու մետաղական հանք։ Մենք պատասխանում ենք այդ կոչին և մեր պատասխանը շատ կարճ է ու հստակ։Ամուլսարի դիրքերը չեն բացվելու, այլ հակառակը՝ ավելի ամրանալու են։ Մենք թույլ չենք տալու, որպեսզի այդ հանքը շահագործվի, Ամուլսարը մնալու է սար։ Մենք պայքարելու ենք մինչև վերջ:

Իսկ հիմա մենք հանդես գանք կոչով, որը ուղղված է այս խնդրով մտահոգ բոլոր հայերին։ Եկեք իրականացնենք ժողովրդական ուժերի միավորում և կանգնենք Ջերմուկում ապրող մեր հայրենակիցների թիկունքին, համայն հայությամբ։ Առաջին քայլը՝ տարածեք այս հայտարարությունը, թող բոլորը տեսնեն և պայքարին միանալու իրենց համաձայնությունը տան հավանումների ու կիսումների միջոցով։ Թող բոլորը տեսնեն ու զգան մեր քանակը, մեր միասնականության ուժը։

Հ․Գ․ Մեր գալիք քայլերը կմշակենք և կհամակարգենք էջի միջոցով, սպասեք գալիք հայտարարություններին, առաջարկները կարող եք գրել մեկնաբանություններում։ Չենք մոռանում կիսվել և տարածել այս, բոլորիս հայտարարություն-պատասխանը վարչապետին»։

Лента

Рекомендуем посмотреть