Онлайн
Քաղաքի անվանակոչության 475-ամյակին նվիրված միջոցառումների շարքում սեպտեմբերի 7-ին Դիլիջանը հյուրընկալել էր «Մշակութային վերածնունդ» Արհեստների և արվեստների համահայկական փառատոնը:
Ինչպես հաղորդում է Դիլիջանի քաղաքապետարանի մամուլի ծառայությունը, ավանդական փառատոնը Դիլիջանում կազմակերպվում է արդեն 7-րդ տարին և միջոցառման կազմակերպիչ Մարիամ Մինասյանը հավաստմամբ հավակնում է հաջորդ տարի ներկայանալ միջազգային փառատոնի կարգավիճակով:
Փառատոնին մասնակցում էին Հայաստանի մարզերի և Արցախի Հանրապետության ներկայացուցիչները: Քաղաքային զբոսայգում տեղադրված տաղավարներում ներկայացված էին ժողովրդական վարպետների աշխատանքները: Ժամանած համերգային խմբերը հանդես էին գայիս հայկական և արտասահմանյան երգերի ու պարերի կատարմամբ: Ներկայացվում էին նաև փոքրիկ բեմականացումներ հայկական հեքիաթների մոտիվներով:
Միջոցառմանը մասնակցում էին Տավուշի մարզպետ Հայկ Չոբանյանը, Դիլիջան համայնքի ղեկավար Արմեն Սանթրոսյանը, ՀՀ-ում արտասահմանյան դեսպանատների ներկայացուցիչներ, ՀՀ էկոնոմիկայի նախարարության վարչության պետ Աշոտ Գիլոյանը, մարզպետարանի և համայնքապետարանի պատասխանատու աշխատակիցներ, համայնքի ավագանու անդամներ:
Մարզպետը համայնքի ղեկավարի ուղեկցությամբ շրջում էր տաղավարներում, ծանոթանում ներկայացված աշխատանքներին:
Փառատոնին ներկայացվեց նաև հայակական ավանդական լավաշ հացի թխելու արարողակարգը՝ տեղում պատրաստված թոնրի շուրջը: Մասնակիցները սիրով վայելեցին նաև դիլիջանյան գարեջուրը: Համերգային ծրագիրը մեկնարկեց Դիլիջանի փողային նվագախմբի ելույթով։
Համերգին միմյանց հերթագայում էին մարզերից ժամանած երաժշտախբերը: Դիլիջանը ներկայացված էր Արվեսի քոլեջի դհոլահարների, համայնքապետարանի երաժշտական դպրոցի համույթներով, շնորհալի անհատ կատարողներով: Համերգի մասնակիցները ջերմորեն ունկնդրեցին երգիչ-երգահան Սամվել Ղասաբյանի կատարումները:
Միջոցառմանը ներկա էին նաև սփյուռքի ներկայացուցիչներ: Ողջույնի խոսքով հանդես եկավ «Սիրիահայերի Միություն» հկ-ի նախագահ Վանի Նալբանդյանը ՝պարային զգեստներ նվիրելով լավագույն կատարողներին:
Լուսանկարները՝ Դիլիջանի համայնքապետարանի և Տավուշի մարզպետարանի ֆեյսբուքյան էջերից։
