ՊՆ-ն առաջարկում է ծառայության համար ոչ պիտանի սահմանել մտավոր հետամնացության բոլոր դրսևորումներով ուղեկցվող հիվանդությունը

ՀՀ պաշտպանության նախարարությունը (ՊՆ) հետևողական է, որպեսզի առողջական որևէ խնդիր ունեցող քաղաքացի չզորակոչվի զինված ուժեր (ԶՈւ), իսկ զինծառայողները, որոնք ունեն առողջական խնդիրներ, ծառայությունից վերադառնան առողջացած: Այս մասին հայտարարություն է տարածելՀՀ ՊՆ խոսնակ Արծրուն Հովհաննիսյանը՝ անդրադառնալով Ժամկետային զինծառայող Յուրիկ Բրոյանի դեպքին։

Հիշեցնենք՝ երեկ ՀՀ ՊՆ ռազմական ոստիկանությունը հայտարարություն տարածեց՝ տեղեկացնելով, որ Նուբարաշենի «Հոգեկան առողջության պահպանման ազգային կոմիտե»-ում շուրջ մեկ ամիս բուժում ստացած ժամկետային զինծառայող Յուրիկ Բրոյանին զորամաս տեղափոխելու նպատակով երեկ կենտրոն ներկայացած ռազմական ոստիկանության աշխատակիցները նրան բուժհաստատությունում չեն գտել, զինծառայողը դուրս է գրվել հիվանդանոցից և գնացել անհայտ ուղղությամբ: Մոր փոխանցմամբ էլ՝ որդին չի պատրաստվում ներկայանալ զորամաս:

ՀՀ ՊՆ խոսնակ Արծրուն Հովհաննիսյանն ընդգծում է․ «Ներկայումս ՀՀ ՊՆ-ն կողմից ՀՀ Վարչապետի աշխատակազմ է ներկայացվել ՀՀ Կառավարության 12.04.2018թ. 404 որոշման մեջ փոփոխություններ կատարելու նախագիծ, որի համաձայն խմբագրվում է զինվորական ծառայության հետ առնչությունը որոշող հիվանդությունների ցանկի առաջին հոդվածը: Դրանով առաջարկվում է մտավոր հետամնացության բոլոր դրսևորումներով ուղեկցվող հիվանդությունը սահմանել ոչ պիտանի զինվորական ծառայության համար: Մինչև նշված փոփոխությունների ընդունումը ՀՀ ՊՆ-ը իրավասու չէ կատարել այնպիսի գործողություններ, որոնք սահմանված չեն օրենքով կամ համապատասխան հարաբերությունները սահմանող այլ նորմատիվ իրավական ակտերով»:

Պատրաստեց՝ Լիաննա Մարգարյանը