Վետերանները որպես պատվովճար 50 հազարի փոխարեն ամսական կստանան 100 հազար դրամ

Հայրենական մեծ պատերազմի վետերանները որպես ամենամսյա պատվովճար 50 հազար դրամի փոխարեն կստանան 100 հազար դրամ․ ՀՀ կառավարությունն ասօրվա նիստում «Հայրենական մեծ պատերազմի վետերանների ամենամսյա պատվովճարի չափը սահմանելու և Հայաստանի Հանրապետության աշխատանքի և սոցիալական հարցերի նախարարության սոցիալական ապահովության պետական ծառայությանը գումար հատկացնելու մասին» որոշման մեջ փոփոխություններ կատարելու մասին նախագիծը հավանության է արժանացրել։

Որոշումն ուժի մեջ է մտնում պաշտոնական հրապարակմանը հաջորդող ամսվա 1-ից։

Որոշման նպատակն է բարձրացնել Հայրենական մեծ պատերազմի վետերանների սոցիալական պաշտպանվածության մակարդակը՝ նրանցակտիվ գործունեությունն ու բարեկեցությունն ապահովելու համար:

Նախագծից տեղեկանում ենք, որ 2019 թվականի պետական բյուջեով Հայրենական մեծ պատերազմի վետերանների պատվովճարների համար նախատեսվել է 238 հազար 200 դրամ 397 շահառուի համար: 2019 թվականի մայիսի 1-ի դրությամբ փաստացի պատվովճար է վճարվել 318 վետերանի։