Онлайн
Այսօր Երևանում հայր և որդի Շառլ և Նիկոլա Ազնավուրները հայտարարել են «Ազնավուր» հիմնադրամի ստեղծման և ինտերակտիվ թանգարանի հիմնադրման մասին:
ՀՀ նախագահն անձամբ է հանձնել շանսոյեին Կասկադում գտնվող «Ազնավուր» թանգարանի բանալիները: Թանգարանը լինելու է հիմնադրամի առաջին նախագիծը:
«Ազնավուր» հիմնադրամի տնօրեն Քրիստինա Սարգսյանի ներկայացմամբ՝ այն լինելու է աշխարհում առաջին ինտերակտիվ թանգարանը, որտեղ հենց ինքը՝ հերոսն է պատմելու իր մասին:
«Երգիչն իր ամբողջ կենսագրությունը գրել, ձայնագրել է եւ հենց նրանից թանգարանի այցելուները կլսեն իր կյանքի պատմությունը»,-լրագրողների հետ զրույցում ասել է Քրիստինա Սարգսյանը՝ տեղեկացնելով, որ թանգարան են տեղափոխվելու նաև աշխարհահռչակ շանսոնյեի անձնական իրերը՝ առաջին դաշնամուրը, հավաքածուից սկավառակները՝ Էդիտ Պիաֆի, Սինատրայի ու այլ մաեստրոների կատարմամբ:
«Այնտեղ լինելու է ամբողջական գործիքավորման, ձայնագրման ստուդիա, որտեղ այցելուները կարող են Շառլի երգերի հետ միքս անել»,-ընդգծել է «Ազնավուր» հիմնադրամի տնօրենը՝ նշելով, որ այդ ամենն արվում է անձամբ շանսոնյեի համաձայնությամբ:
Թանգարանի բացումը նախատեսված է 2018 թվականին:
