Երկաթուղայինների օրը` օգոստոսի 5-ին, երթևեկությունը մերձքաղաքային էլեկտրագնացքներով կլինի անվճար՝ բացառությամբ №100/101 Երևան-Գյումրի-Երևան էքսպրեսի։ Այդ մասին տեղեկացնում են «Հարավկովկասյան երկաթուղի» ընկերությունից։
«Հայաստանի երկաթուղայինները նույնիսկ իրենց մասնագիտական տոնին կշարունակեն աշխատել սովորական ռեժիմով, ապահովելով երկաթուղային համակարգի անխափան աշխատանքը՝ հոգ տանելով ուղևորների հարմարավետության մասին»,-նշում են ընկերությունից՝ հավելելով, որ այս տարի Հայաստանի երկաթուղայինները բացի մասնագիտական տոնից նշում են նաև «ՀԿԵ» ՓԲԸ 10-ամյակը:
Նախորդ տարի, հիշեցնենք, երկաթուղայինները տոնեցին երեք հոբեյլան՝ Ալեքսանդրապոլից Երևանի կայարան առաջին գնացքի ժամանման 115-ամյակը, Ջաջուռի թունելի կառուցման 120-ամյակը և Հայաստանի երկաթուղու էլեկտրաֆիկացման 50-ամյակը: