Онлайн
Ինչպես հաղորդել էինք ավելի վաղ, Սերժ Սարգսյանի՝ որպես վարչապետի հետագա պաշտոնավարմանն ընդդիմացող «Իմ քայլը» նախաձեռնության ղեկավար, ԱԺ «Ելք» խմբակցության պատգամավոր Նիկոլ Փաշինյանը հայտարարել էր, որ հանրահավաքը Ֆրանսիայի հրապարակից այսօր տեղափոխվելու է Հանրապետության հրապարակ:
«Այսօր տեղի է ունենալու Հայաստանի պատմության մեջ ամենամեծ հանրահավաքը: Լցնելու ենք Հանրապետության հրապարակը»,-քիչ առաջ հայտարարել էր Նիկոլ Փաշինյանը՝ նախանշելով այն 18:30-ին:
Այս պահին ցուցարարները փակել են Հանրապետության հրապարակին կապող բոլոր ճանապարհները՝ կաթվածահար անելով երթևեկությունը։
Կաթվածահար է նաևՀՀ պետական գերատեսչությունների շենքերի ելումուտը. մինչ խորհրդարանում ընթանում էր վարչապետի ընտրության հատուկ նիստը՝ Նիկոլ Փաշինյանը և իր համակիրները երթով շարժվեցին դեպի ՀՀ պետական գերատեսչությունների շենքեր՝շրջափակելով նախ ՀՀ դատախազության շենքը, այնուհետ՝ արտաքին գործերի, կրթության, մշակույթի, սփյուռքի և արդատադատության նախարարության շենքերը: «Ռադիո Վանի» այն հարցին, թե որքան են շրջափակած պահելու պետական կառույցները՝ Նիկոլ Փաշինյանը պատասխանեց՝ որքան կարողանան: Փաշինյանը մասնակիցներին հորդորեց ուղղություն վերցնել դեպի Հանրապետության հրապարակ, որտեղ քիչ անց կմեկնարկի հանրահավաքը, նա նաև նշեց, որ տեղեկություն ունի այն մասին, որ ոստիկանությունը սադրիչներ է ներդնելու իրենց շարքերում, որոնք պետք է խաղաղ հավաքը դարձնեն ըմբոստ, կոտրեն, փշրեն, ծեծեն։
Այս պահին ՀՀԿ կենտրոնական գրասենյակը հսկվում է ոստիկանների կողմից, Մելիք-Ադամյան փողոցի սկզբնամասում, որտեղ տեղակայված է գրասենյակը, մեքենաների և հետիոտների մուտն արգելող ուղեփակոցներ են տեղադրված: Տարածքում կուտակված են ոստիկանական խմբեր:
