Մայրաքաղաքի Սբ. Սարգիս եկեղեցու հարևանությամբ գտնվող Մաշտոցի պողոտա-Գրիգոր Լուսավորիչ փողոցների գետնանցումում այս օրերին բանվորներ են աշխատում. ճաղավանդակներով սահմանազատված տարածքի ապակիները կոտրված են, գետինն ամբողջովին պատված է դրանց կտորտանքով, իսկ տարածքում առկա գույքը սևածածկ է:
Տեղեկանալու համար, թե ինչ է կատարվում տարածքում՝ ով է ղեկավարում գետնանցումում այս օրերին կատարվող մաքրման աշխատանքները և, թե ինչին է ծառայելու և/կամ ինչ է կառուցվելու այդ վայրում՝ «Ռադիո Վան»-ը օրեր առաջ՝ մարտի 14-ին, հարցում է ուղարկել Երևանի քաղաքապետարան:
Քաղաքապետարանից այսօր ստացված պատասխան նամակում տեղեկացվում է, որ «գետնանցումում կատարվել են հրդեհի հետևանքով թափման վտանգ ներկայացնող սվաղված մակերեսների քանդման, տեղափոխման և լվացման աշխատանքներ:
Նշենք, որ սա մայրաքաղաքի այն գետնանցումներից է, որը առաստաղի հնարավոր փլման հետևանքով ոչ միայն վտանգավոր է քաղաքացիների համար, այլև գտնվում է սանիտարահիգիենիկ ոչ պատշաճ վիճակում՝ ոմանց համար «ծառայելով» որպես զուգարան: Թե երբ կապիտալ հիմնանորոգում կկատարվի այդ տարածքում՝ դեռ հայտնի չէ. 2018-ի քաղաքային բյուջեով նման աշխատանքներ նախատեսված չեն: