Այսօր՝ փետրվարի 12-ին, Մերձմոսկվայում նախօրեին կործանված ԱՆ-148 օդանավի զոհերի հիշատակին Օրենբուրգում սգո օր է հայտարարվել
Հիշեցնենք՝ «Սարատովյան ավիաուղիներ» ընկերության Ան-148 մարդատար օդանավը ռադիոտեղորոշիչների տեսադաշտից կորել է Մոսկվայի «Դոմոդեդովո» օդանավակայանից օդ բարձրանալուց անմիջապես հետո փետրվարի 11-ին Մոսկվայի ժամանակով 14։27-ի սահմաններում (Երևանի ժամանակով 15։27)։ Այն կատարում էր Մոսկվա-Օրսկ չվերթը։
Ինքնաթիռում եղել է 65 ուղևոր և անձնակազմի 6 անդամ. բոլորն էլ զոհվել են։ Զոհերի մարմինների ճանաչումը տեղի կունենա Մոսկվայի փորձաքննությունների բյուրոյում:
Զոհերի թվում երկու հայ կա. նրանցից մեկը երկրորդ օդաչու Սերգեյ Ղամբարյանն է, մյուսը՝ ուղևոր Վարսիկ Սևոյանը:
Օդանավի կործանման դեպքով ՌԴ քննչական կոմիտեն քրեական գործ է հարուցել: Ինքնաթիռի վթարի վայրում հայտնաբերվել է սև արկղերից մեկը: «Գազետա.ռու»-ի փոխանցմամբ՝ այնբավարար վիճակում է:
Նշվում է, որ օդանավի կործանման պատճառ կարող էին լինել եղանակային պայմանները, ինչպես նաև անձնակազմի սխալը։