Թուրքմենստանում արդեն մոտ մեկ ամիս է կանանց չի թույլատրվում ավտոմեքենա վարել: «Թուրքմենստանի այլընտրանքային լուրեր» կայքի հաղորդմամբ՝ սկզբում ոստիկանները կանանց ընդամենը նախազգուշացրել են այդ արգելքի մասին, սակայն այժմ նրանք վերցնում են ավտոմեքենա վարող կանանց վարորդական իրավունքի փաստաթուղթը, իսկ փոխադրամիջոցը տեղափոխվում է տուգանային հրապարակ:
Կայքի աղբյուրը նշել է, որ սեփական ավտոմեքենաներով աշխատանքի գնացող պետական հաստատությունների կին աշխատակիցներից գրություն են վերցրել, որով նրանք պարտավորվում են այսուհետ մեքենա չվարել:
Նշվում է, որ նախորդ տարվա դեկտեմբերի հինգին Թուրքմենստանի ներքին գործերի նախարարը երկրի նախագահ Գուրբանգուլի Բերդիմուհամեդովին տեղեկություն է ներկայացրել այն մասին, որ երկրում ՃՏՊ-ների մեծ մասը տեղի է ունենում կին վարորդների պատճառով կամ նրանց մասնակցությամբ, ինչից հետո նախագահը հրահանգել է նախարարին «շտկել իրավիճակը»: