Онлайн
Երևանի կենտրոնը բեռնաթափելու նպատակով տրանսպորտային երեք խոշոր հանգույցների կառուցման նախագծային փաթեթներ են մշակվում: Այդ մասին այսօր, «ՀՀ 2016 թ. պետական բյուջեի կատարման մասին» տարեկան հաշվետվության ժամանակ, ասել է Երևանի քաղաքապետի առաջին տեղակալ Կամո Արեյանը:
«Առաջինը Գարեգին Նժդեհ և Արշակունյաց փողոցների տրանսպորտային հանգույցի ձևավորումն է: Այստեղ առաջարկվում էր վերգետնյա ճանապարհի տարբերակ, մինչդեռ այն չի ընդունվել, քանի որ կխաթարեր քաղաքաշինական միջավայրը: Հիմա նոր տարբերակն է քննարկվում: Երկրորդը Ագաթանգեղոս-Գրիգոր Լուսավորիչ-Արշակունյաց փողոցներին հարող ստորգետնյա տրանսպորտային հանգույցի ստեղծման ծրագիրն է, ինչը նպատակ ունի բեռնաթափել վերը նշված փողոցների ծանրաբեռնվածությունը: Երրորդ ծրագիրը` Իսակով-Լենինգրադյան նոր ճանապարհի կառուցման շարունակականությունն է»,-մանրամասնել է փոխքաղաքապետը:
Ճանապարհաշինական աշխատանքները նախատեսվում է իրականացնել Ասիական զարգացման բանկի ֆինանսավորմամբ մինչև 2022 թվականը:
