ԱՄՆ Ինդիանա նահանգը Հայոց ցեղասպանությունը ճանաչող և դատապարտող հայտարարություն է ընդունել, ըստ որի պաշտոնապես ճանաչում ու ոգեկոչում է Օսմանյան կայսրության կողմից իրականացված շուրջ 3 մլն հայերի, հույների, ասորիների և սիրիացիների համակարգված բնաջնջումը:
ԱՄՆ Հայ Դատի հանձնախմբի պաշոտնական կայքի տեղեկացմամբ՝ Ինդիանայի նահանգապետ Էրիկ Հոլքոմբի ընդունած հայտարարության տեքստում նշվում է, թե թուրքական կառավարության իրականացրած ոճրագործությունն արդարություն է պահանջում։ Դրանում հիշատակվում է Մերձավոր Արևելքում քրիստոնյաների, այդ թվում եզդիների և այլ փոքրամասնությունների նկատմամբ «Իսլամական Պետություն» ահաբեկչական խմբավորման կողմից իրականացված ցեղասպանությունը:
«Ճանաչելով, հետևողականորեն ոգեկոչելով ու ուսուցանելով Հայոց Ցեղասպանությունը, Հոլոքոստը, ինչպես նաև անցյալի ու ընթացիկ ցեղասպանությունները՝ կպահպանվի պատմական հիշողությունը, կկանխարգելվի ապագայում նմանօրինակ հրեշավոր հանցագործություններ կրկնությունը»,-համոզմունք հայտնում հայտարարության հեղինակները:
Ինդիանայի նահանգապետ Հոլքոմբը նոյեմբերի 6-12-ը հռչակել է «Հայկական հարցի իրազեկման շաբաթ»՝ կոչ անելով Ինդիանայի քաղաքացիներին հիշատակել այդ տարելիցը:
Ինդիանան դարձավ ցեղասպանությունը ճանաչած 48-րդ ամերիկյան նահանգը: