Ֆրանսիայի Նանտ քաղաքի ավտոբուսների և տրամվայների վարորդները, որոնց արգելվել է շոգ եղանակին շորտեր և բրիջիներ կրել, բողոքի ակցիա են իրականացրել: Ի նշան բողոքի՝ նրանք աշխատանքի են գնացել կանացի կիսաշրջազգեստներով:
Ակցիայի մասնակիցների խոսքով՝ ի տարբերություն կին-վարորդների, որոնց թույլատրվում է աշխատանքի գնալ կիսաշրջազգեստով, տղամարդ վարորդների համար թեթև համազգեստի այլընտրանք չկա:
«2013 թվականից սկսած մենք պայքարում ենք, որպեսզի տղամարդ վարորդները կարողանան կարճացված տաբատներ կրել որոշակի ջերմաստիճանի»,-նշել է բողոքի ցույցի մասնակից, արհմիութենական կազմակերպության ներկայացուցիչ Գաբրիել Մանյերը:
Վարորդները նշում են նաև, որ իրենք ստիպված են լինում աշխատել ծանր պայմաններում, քանի որ, երբեմն, տրամվայներում՝ վարորդի խցիկում, օդի ջերմաստիճանը հասնում է նույնիսկ +50-ի:
Ֆրանսիայում այս շաբաթ գրանցվել է ջերմաստիճանի կտրուկ բարձրացում: Փարիզում այսօր կեսօրին +37 աստիճան է եղել:
Նշվում է, որ տնօրինության կողմից դեռ որևէ արձագանք բողոքի ակցիային չի եղել: